يخّي قدّاش من مرّة بش ننتخبوا؟

في آخر جوان، ركبت في تاكسي و  ما عينيش بش نحكي، على خاطر، من غير ما نعمّم، التاكسيستية يطلّعوهالي. التاكسيست سكت سكت، و ممبعد قالّي:

خويا تفهم شويّة في السياسة؟

شويّة مش برشى.

يخّي قلّي، يخي توّة الإنتخابات إلّي بش يصيروا، بش ننتخبوا فيهم رئيس؟

لا، مجلس تأسيسي.

تي شنيّة هذية، ديمة نسمعها في الرّوادن و التلافز، و لتوّ لا فهمتها.

فسّرتلو بالفلّاقي شنوّه دور المجلس التّأسيسي و كيفيّة إنتخابو، و كيفاش ممبعد بش ننتخبوا رئيس، و ممكن ياسر قبل يصير إستفتاء على الدّستور. غزرلي و قالّي:

  يخّي قدّاش من مرّة بش ننتخبوا؟
 تلاثة مرّات آما على عامين تلاثة     

تي ما عندي ما نعمل آنا، بش نقعد ماشي جاي و مسيّب خدمتي؟