في بلاد الطررني كي تقول الحق و تدافع على المظلوم يغتالوك
في بلاد الطررني بعد ما كفروك و خونوك و سبوك و هددوك في المجلس متاعهم، في التلافز، في الجوامع قالوا إلي هوما خاطيهم آما نداء تونس هو إلي قتلك، الموساد هو إلي إغتالك، الجبهة الشعبية خلقت الحكاية الكل بش تطيح الحكومة، الجزاير هي إلي ورا الإغتيال بش تشوه صورة الحركة، فرنسا هي إلي دبرت الحكاية بش تحتلنا من جديد.
في بلاد الطررني كي يخرجوا مليون بكل تلقائية لدفينتك يتهجم عليهم البوليس و العصابات تحرق الكراهب و تسرق المحلات.
في بلاد الطررني مفتي الجمهورية رقد رقد و قام ندد بحضور مرتك و بنتك لجنازتك. أيمة الأنوار في عوض ما ينبذوا العنف بعد ما شنعوها بالتحريض على القتل يفتيوا في هل تجوز الصلاة على الكافر و هل يجوز دفنك في مقبرة المسلمين.
في بلاد الطررني، بعد ما يغتالوك، يخرجوا إلي كفروك و دمك ردوه حلال، جماعة الأمر بالإرهاب و النهي عن المنطق يدزوا في صدوراتهم و يدوروا الشوارع على الموتورات قال شنوة يحميوا في ممتلكات الناس
في بلاد الطررني الحكومة ما تمشيش في جنازتك آما تدعو إلى مليونية من غدويكة باش تقول إلي مش هي السبب في إغتيالك.
في بلاد الطررني يخرجوا كعبتين يتظاهروا بعد ما شراوهم بمليون شوكوطوم و يدافعوا على شرعية الحكومة و على تطهير الإعلام و ينددوا بالإستعمار الفرنسي برفع أعلام السعودية و مايصير شيء لا تكسير لا لكريموجين.
في بلاد الطررني إلي شادين في الكراسي حتى الموت كيما قالها عضو تناسلي من المجلس التعصيصي يعاودوا يخرّجوا الشوكوطوم على خاطر في المظاهرة الأولى ماهبطوش برشى ثوار الشوكوطوم و يزيدوها تطبيق الشريعة في شعاراتهم. علمات الكبوة أكثر من علمات تونس. ما ثمة حتى شعار ضد العنف.
في بلاد الطررني الرئيس المقيت يصرّح بأنهم إمتصوا الغضب و سيدو الخريجي إلي المرزوقي إمتصلوا القضب، الغضب متاعو يهدد و يتوعد أي واحد يتهمو في قضية إغتيالك.
في بلاد الطررني وزير ا لتعليم العالي برشى يقول على علي الدوعاجي متاع بلاد الطررني أنو زنديق، فاسق و مدمن مخدرات.
حاسيلو بلاد الطررني ما تستاهلكش، عندها ثوارها، ثوار الشوكوطوم، ثوار هل يجوز، ثوار إلي يقتلك و يتظاهر ضد جنازتك.
